عواد يا قلبي الراجح عواد

عواد يا قلبي الراجح عواد

إرجع لفن الخلاعه ثانيه

ما فايده للتمعقال يا جواد

أوقد نيت الليالي الماضيه

خلى الجاجيد في الجامع زواد

ما تعتبر بالقرون الخاليه

تبقى تصلى على خبط الرماد

وقيمة الدين عندك باليه

خلى دوانك صمغك والمداد

ما فايده في الهدار والداويه

كسرت راسك مع روس العباد

وما بدالك بعلمك باديه

قرابتك أصلها تشتى بلاد

وباللمع والحواشي ناحيه

وقيمة الشرح تدى لك بجاد

وتشترى بالخبيصي جاريه

والشاطبيه بها غثه جراد

وشل غثه كراث بالشافيه

والتذكره قد تخرج لك رشاد

وأشرك من الكبزرى بالكافيه

نهج البلاغه يقع عيشه سداد

وان هو محوشا فعيشه هانيه

وبالشفا تشترى وقت الكساد

إذا وصل لبتين في الصافيه

بقيت في العلم لا سى كالقراد

دايم مواضب بهمه عاليه

قالوا قد الغيد يتقرا يا عماد

ما قد سمعنا بحرمه قاربه

ما كل من قد عشق يلقى سعاد

ولا شميم الفحوس كالكاذبه

ولا شذا الند يعدل بالزباد

ولا سبول الغرب كالغاليه

ولا الذي في الهوى سلس القياد

مثل الذي حاز مهجه قاسيه

ولا الغليظ الذي طبعه جماد

مثل المهذب رقيق الحاشيه

ولا الذي ملقنه يقدح زناد

مثل الذي له قريحه فاهيه

ولا المصانع تقع ذات العماد

ولا الفرات الغزير كالجابيه

ما يلقف الضرب بالبيض الحداد

من هو مرجى دوام العافيه

ولا الحصان الحجين مثل الجواد

ولا القرون الطوال كالناصيه

ولا الذي قالبه مشدود شداد

ولا الرقاب الذلال كالعاصيه